Link açıqlığı

Vilâyet devlet memuriyetiniñ Reisi Yuriy Odarçenkonıñ bildirgenine köre, Qırımdan Hersonğa köçken insanlarnıñ sayısı 70 adamnı teşkil ete.

«Olarğa kira berildi, bala ve studentler oquv yurtlarında qabul etile», – dedi Odarçenko.

O, şunı da qayd etti ki, Hersonda Ukraina Sıñır hızmetiniñ 313 azası daimiy sürette buluna. Vilâyet devlet memuriyeti reisiniñ aytqanına köre, olarğa iş ve kira berilmeli.

Odarçenko Ukraina akimiyetine muracaatta bulunıp, Herson vilâyeti ve Qırım arasında memuriy sıñırğa uquqiy status berilmesini soray. Böyle etip, vatandaşlarnı kirsetüv ve naqliyat keçiti noqtalarını teşkil etmege imkân olacaq.

2014 senesi martnıñ 17-den başlap aprelniñ 3-ne qadar ükümetniñ «acele bağına» Qırım yarımadasından köçecek olğan adamlardan 6288 muracaat keldi.

Ukraina Mudafaa nazirliginiñ malümatına köre, aprelniñ 2-de Ukrainağa Qırım Muhtar Cumhuriyetinden 1059 adam keldi. Olardan 385 zabit, 547 serjant ve añlaşma esasında hızmet etken asker, Ukraina Silâlı Quvetleriniñ 2 hadimi ve olarnıñ 125 qoranta azası, şu cümleden 38 bala, bar.
XS
SM
MD
LG