Çeçek ayınıñ 22-nde Zaporojjâ şeerine Rusiye ücüm etkeni neticesinde 23 insan zarar kördi, dep haber ete Ukrayina baş prokurorınıñ ofisi.
Uquq qoruyıcılar insan ölümine ketirilgen arbiy cinayet ile bağlı cinaiy iş açtılar.
"Tahqiqatnıñ malümatına köre, 2025 senesi çeçek ayınıñ 22-nde istilâcı devletniñ ordusı Zaporojjâ infrastrukturasına ava ücümini yaptı. İlk malümatqa köre, 55 yaşında qadın elâk oldı, daa 23 insan yaralandı, olarnıñ arasında dört bala bar", — dep aytıla haberde.
Müessiseniñ bildirgenine köre, patlav çoq qatlı binanıñ üst qatlarını bozdı, etrafındaki evlerniñ pencereleri qırıldı ve balkonları zararlandı. Diger infrastruktura obyektleri ve yanında park etilgen maşnalar da viran etildi.
Zaporojjâ vilâyetiniñ yolbaşçısı İvan Fedorov şeerde 22 yaralanğan kişi aqqında bildirgen edi. O, yaralanğan balalar aqqında malümatnı da aydınlattı:
"16, 14, 4 ve 3 yaşında oğlanlar şimdi hastahanede bulunalar. Olarnıñ alı ekimler tarafından orta ağır dep sayıla. Balalarğa bütün kerekli yardım kösterile".
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, tınç ealini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
