Zaporojjâ şeeriniñ merkezinde Rusiyeniñ ücümi neticesinde 16 insan yaralandı, dep bildirdi vilâyetniñ arbiy memuriyetiniñ başı İvan Fedorov.
"Dört kişi hastahanege alındı. Bu, şimdilik malümat. Hastahanede orta ağır alda dört qadın buluna. Diger zarar körgenler evde tedaviylene", — dep yazdı Fedorov sentâbrniñ 23-nde saba telegramda.
OVA yolbaşçısınıñ aytqanına köre, 13 çoq qatlı bina, oquv yurtları, şahsiy mülkiyet, maşnalar, garajlar ve şahsiy evler zarar körgen.
"Duşman gece ücüm etti — Zaporojjâ ve Zaporojjz rayonına eñ azından yedi ava darbesini endirdi. Al-azırda zarar körgen yerlerde qurtarıcılar, kommunal hızmetleri ve göñülliler çalışmağa devam ete. Bütün muhtac olğanlar malümat ve yardım ala bilecek Yeñilmezler noqtaları açıldı", — dep qoştı o.
RF reberligi, Rusiye ordusı Ukrayina şeerleri ve köyleriniñ grajdan infrastrukturalarına maqsatlı darbelerini endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
