Zaporijjâda oktâbrniñ 30-nda gece Rusiyeniñ raketa-dron ücümi neticesinde eñ az 15 kişi yaralandı, dep bildirdi vilâyetniñ arbiy memuriyet yolbaşçısı İvan Fedorov.
Saat 8:20-ge qadar 13 yaralanğan aqqında haber etildi – “insanlar stress alında, yırtılğan yaraları, kontuziya ve sınıqları bar”.
Saat 9:30-da 15 kişi yaralanğan edi, qurtarıcılar bina yıqıntıları tübünde eñ az eki kişi bar, dep tasdıqladı.
Fedorov haber etkenine köre, yataqhanege ücüm etildi, bir qaç qat yıqıldı. “Bir qaç yanğın çıqtı. İnfrastruktura obyektleri zarar kördi”, – dep yazdı memur beş saattan soñ.
Daa bir erkek Rusiyeniñ Pologovskiy rayonına ücümi neticesinde yaralandı. “Rusiyeliler Gulâypole cemiyetine fpv-dronınen darbe endirdi. Yaralanğan insanğa kerekli yardım kösterildi”, – dep qayd etti İvan Fedorov.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
