Zaporijjâ vilâyetinde Kameşevahska ğromadasına qarşı üç raketa ücümi sebebinden yaralanğan ve elâk olğanlar bar, dep bildirdi cumaertesi künü Ukrayına Milliy polisiniñ matbuat hızmeti.
«Duşman barışıqsever mesken yerge raketalarnen (çeşiti baqıla) eki kere ücüm etti. Eki ücüm neticesinde dört yerli sakin yaralandı, ev yanıp başladı. Adise yerine polis ve qurtarıcılar kelgende terrorist memleketniñ arbiyleri tekrar ateş açıp başladı. Fevqulâde vaziyetler devlet hızmetiniñ eki hadimi elâk oldı, daa üç işdeşi farqlı yaralar aldı», – dep aytıla polisniñ Telegram haberinde.
Zaporijjâ vilâyetiniñ arbiy memuriyeti şimdilik tafsilâtlı malümat bermey.
Akimiyetniñ malümatına köre, noyabrniñ 17-nde Rusiye ordusı Zaporijjâ şeerine qarşı 8 «şahed» qullandı, ava mudafaa sisteması 4 uçucısıznı urıp tüşürdi, daa 4 uçucısız vatandaş ve mesken infrastruktura obyektlerine darbe endirdi. Bundan ğayrı, Rusiye arbiyleri Vasılyıvskıy ve Poloğivskıy rayonlarınıñ mesken yerlerine aviatsiya, toplu ateş reaktiv sistemaları, uçucısızlar ve toplarnen ücüm etti. Keçken künü yaralanğanlar olmadı.
Rusiye arbiyleri, top, toplu ateş raket sistemaları, dron ve raketalarnı qullanıp, Ukrayina şeerlerine muntazam sürette ateş aça. Delil ve şaatlıqlarğa baqmadan, Moskva Ukrayinada vatandaşlarğa qarşı ücüm yapqanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
