Rusiye Federatsiyasınıñ arbiyleri gumanitar yardım ketirgen Ukraina kolonnası Melitopol tarafından Zaporijjâ vilâyetine keçmege tırışqanda onı toqtatıp, tahliye içün avtobuslarnı alğanlar. Bu aqta Zaporijjâ vilâyeti arbiy memuriyetiniñ yolbaşçısı Aleksandr Staruh bildirdi.
«Melitopol şeerine gumanitar yardımnen ketken avtobuslar kolonnası aqqında malümat. Olarnı tahliye etilgen insanlarnen bekledik. Aydavcılarğa bir avtobusqa minip, keri qaytmağa aytıldı. Qalğan avtobuslarnı raşistler musadere etti», – dep haber etti Staruh.
Rusiye Federatsiyasınıñ ordusı tarafından musadere etilgen tahliye naqliyatı aqqında malümatnı Melitopol şeer yolbaşçısı İvan Fedrov da tasdıqlay. Onıñ qayd etkenine köre, naqliyattan ğayrı, Rusiye arbiyleri ağır hastalar içün ilâc, aş ve gigiyena vastaları olğan bütün gumanitar yükni de topladı.
Aprelniñ 7-nde Zaporijjâdan Melitopolge gumanitar kolonna yollanıldı. Zaporijjâ vilâyetiniñ arbiy memuriyeti bildirgenine köre, anda qaytqanda Melitopol sakinlerini tahliye etecek doquz avtobus bar edi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
