Zaporijjâ vilâyetiniñ Prımorsk qasabasında Rusiye dronunıñ ücümi neticesinde qadın elâk oldı, dep bildirdi vilâyetniñ arbiy memuriyetiniñ yolbaşçısı İvan Födorov.
"İşğalciler bütün gece Primorskke ücüm ettiler, saba beş insan ketken vatandaş maşnağa ücüm ettiler. Yaralanğan 47 yaşında qadın anda can berdi", — dep yazdı o.
Qayd etilgenine köre, dört adam yaralandı. Bular 46 ve 60 yaşında eki erkek ve 49 ve 52 yaşında eki qadın. Olarnıñ episi şimdi hastahanede. Adamlardan biri pek ağır alda buluna. Tibbiyet hadimleri kerekli yardımnı köstereler.
Rusiye arbiyleri Ukrayina regionlarına çeşit silâlarnen muntazam surette ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
