Ukrayına Silâlı quvetleriniñ 128-inci Zakarpattâ ayrı dağ-ücüm brigadasınıñ vekilleri Rusiyeniñ Zaporijjâ vilâyetinde köylerden birine kerçekleştirgen darbesi neticesinde 19 arbiy elâk olğanını tasdıqladı. Bu aqta brigadanıñ Facebook saifesinde haber etile.
Arbiylerniñ aytqanına köre, adise teşkerile. Brigadanıñ vekilleri «teşkerilmegen, sıq-sıq sahte olğan malümatnı» tarqatmamağa rica etti. «Eñ eyi askerlerimiz can berdi... Tuvğanlarına teren taziyeler bildirip, qardaşlarımız içün 100 qat intiqam almağa söz beremiz», – dep aytıla brigadanıñ haberinde.
Evel bildirilgenine köre, noyabrniñ 3-nde Rusiye ordusı Zaporijjâ vilâyetinde cebege yaqın köylerden birine «İskander» raketasınen ücüm etti. Ukrayına kütleviy haber vastalarınıñ malümatına köre, 128-inci brigadanıñ zabitlerinden biri Topçular künü munasebetinen arbiylerge tantanalı şekilde mukâfat bermege istedi. Em arbiyler, em adiy sakinler arasında çoq sayıda ölü bar, dep aytıldı.
«Ukrayınska Pravda» Ukrayına İç işler nazirligindeki menbalarına esaslanıp, 20-den çoq arbiy, şu cümleden Hmelnıtskıy vilâyetiniñ arbiy komissarlıqnıñ sabıq reberi, dep bildirdi. Ukrayına Silâlı quvetleriniñ strategik komandanlığı da arbiylerniñ elâk olğanını tasdıqladı.
Ukrayına Mudafaa nazirligi Rustem Umerov Mudafaa nazirliginiñ Baş inspektsiyasına «tam teşkerüv» keçirmege emir berdi.
Zakarpattâ vilâyetinde elâk olğan arbiylerniñ hatırasına üç künlik matem ilân etildi. Bu aqta Zakarpattâ vilâyetiniñ arbiy memuriyet yolbaşçısı Viktor Mıkıta bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
