Zaporijjâ şeeriniñ İnqilâp Ğaramanları meydanında iyülniñ 21-nde aqşam üstü qırımtatarlarnen birdemlik mitingi olıp keçti. Tedbirge yerli faaller ve şeerde olğan Ukraina birligi içün umumukrain motoprobeginiñ iştirakçileri keldi. Bu aqta Azatlıq Radiosı haber ete.
«Birlik motoprobegi – moto toplulığınıñ bir olması ve Ukraina mustaqillikni alğan topraqlarda yekâne olması içün… Qırımtatarlarnıñ bayrağını da ketiremiz. Onı Çonğarda berecekmiz. Anda «Asker» batalyonı tura. Qırımtatarlarnı unutmağanımıznı, Qırım Ukraina olğanını hatırlağanımıznı kösterip, ilhaqınıñ bitmesine irişecekmiz. Bizni ne qadar bölmege tırışsalar da, Ukraina bir, birlik olmaq kerekmiz», – dedi motoprobeg teşebbüsçisi Nikolay Spiridonov.
Ukraina birligi içün motoprobeg iyülniñ 15-nde Ujgorodda başladı. Tahminen 300 bayker iştirak ete.
Aktsiya vaqtında baykerler bütün memleketni dolaşıp, Mariupolde ve Çonğarda Ukraina imayecilerini ziyaret etecek. Faallerniñ yanında eki büyük bayraq bar: Ukraina devlet bayrağı ve qırımtatar milliy bayrağı. Avtoyürüş iyülniñ 23-nde Odesada yekünlenecek.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
