Zaporijjâda Festivalnaya meydanında iyünniñ 26-nda Qırımtatar bayraq künü munasebetinen aktsiya keçirildi. Bu aqta Azatlıq Radiosınıñ mühbiri haber ete.
Tedbir iştirakçileri Qırımdaki vaziyetni hatırlatmaq ve qırımtatarlarğa qoltutmaq içün keçken insanlarğa qırımtatar bayraqlarını berdi.
Faaller şeerniñ merkezindeki bayraq tayağında qırımtatar bayrağını köterdi. Zaporijjâ merkezinde bayraq kün boyunca dalğalanacaq.
«Men özüm qırımlım, qırımtatarlarğa vatanlarına qaytmağa imkân berilgen 1988 senesinden berli ayatım olarnen sıqı bağlı. Mında köçip, qırımtatarlar keçirgen bütün aktsiyalarğa qoşulam. Bugün qırımtatar bayraq künü ve bütün dünya bu künni qayd ete. Qırım Ukraina olğanını hatırlatamız, işğal erte ya da keç biter ve er şey yahşı olacaq», – dep ayttı aktsiya teşkilâtçılarından biri, qırımlı Natalya.
İyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın renkli tamğa tasvir etilgen kök renkli bir bayraqtır.
Qırımda, esas Ukrainada ve dünyanıñ diger memleketlerinde bayram tedbirleriniñ keçirilmesi planlaştırıla.
