Rusiye Federatsiyasınıñ büyük istilâsınıñ yılında Ukrayına Silâlı quvetleriniñ baş komandanı Valeriy Zalujnıy ukrayınalılarğa muracaat etti.
«Metanetimizniñ temeli – insanlar. Adiy insanlar. Adiy Qaramanlar. Olar aramızda. Biznen bir sırada. Bu insanlar tuvğanlarını, evlerini ve devletini duşmannıñ sebepsiz istilâsından qorumaq içün qoluna silâ aldı. Bu insanlar bu daqqaları işğalcini ura, mevzilerini qoruy, suvuq, amma tuvğan topraqta üşüy, qardaşlarınıñ ayatlarını qoruy, orduğa yapa bilecek er şeynen yardım ete. Cenkniñ doquz yılı devamında beton ve çelikten qaviy oldıq, çünki DAP ve Azovstal imayecileriniñ yeñilmezligini unutmadıq», – dep yazdı o.
Zalujnıy ukrayınalılarğa teşekkürler bildirdi: «Silâlı quvetler ve Ukrayına Mudafaa quvetleriniñ diger küçlerinde hızmet etken er kes – ürmet ve teren minnetdarlıq… Azatlıq oğrunda elâk olğanlarğa – Ebediy hatıra ve ürmet».
«Dayanacaqmız. Ve ğalip çıqacaqmız!», – dep bitirdi muracaatını Ukrayına Silâlı quvetleriniñ baş komandanı.
Ukrayına prezidenti Volodımır Zelenskıy Rusiyeniñ tam istilâsı başlanğanınıñ yılını «ağrı, acınuv, işanç, birlik ve yeñilmezlik yılı» dep adlandırdı.
Bıltır fevralniñ 24-nde Rusiye bütün sıñırda ve Beyazrusiyeden Ukrayınağa tam istilâ başlattı. Ukrayına Silâlı quvetleriniñ Baş ştabı malümatına köre, Rusiye bu vaqıt devamında Ukrayınağa aman-aman beş biñ raketa attı.
BM eñ az 8006 vatandaşnıñ ölümini qayd etti – daa 13 287 kişi soñki 12 ayda yaralandı. Teşkilât kerçek raqamlar daa yüksek, dep qayd ete.
Kreml istilânı inkâr etip, yapqanlarını «mahsus arbiy operatsiya» dep adlandıra. Onıñ maqsadı olaraq ise «Ukrayınanıñ askeriylesizleştirilüvi ve denatsifikatsiyası» ola eken.
Ukrayına Silâlı quvetleriniñ vekili Yuriy İgnat Arbiy ava quvetleri fevralniñ 23-24-nde Rusiyeniñ provokatsiyalarını bekley, dep ayttı. Onıñ bildirgenine köre, Ukrayına arbiyleri quvetleştirilgen nevbetçilik tuta.
Ukrayına Mudafaa nazirliginiñ Baş istihbarat idaresiniñ yolbaşçısı Kırılo Budanovnıñ fikirince, Rusiye fevralniñ 24-ne «büyük olmağan raketa darbesini» planlaştıra bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
