Ukrayına Silâlı quvetleriniñ baş komandanı Valeriy Zalujnıy Rusiye prezidenti Vladimir Putinniñ özek silâsı qullanıla bile degen qorquzuvlarını izaatladı.
«Meni bu (özek silâ qorquzuvları – QA) toqtatmay. İşimizni yapamız. Ne içündir bu signallar tışarıdan kele: «özek silâ darbesinden qorquñız». Ne yapayıq, vazgeçeyikmi?», – dedi Zalujnıy The Washington Post neşirine bergen intervyüsında.
Bundan ğayrı, Zalujnıy «Vagner şahsiy arbiy kampaniyası» yalçılarınıñ arbiy isyanı Ukrayına Silâlı quvetleri qarşı ücümini tezleştirgeninden emin degil. Onıñ aytqanına köre, «vagnerciler» «Bahmut uruşlarından soñ cebeden çetleşti, şunıñ içün isyan vaqtında uruş meydanında bir deñişme körünmedi».
«Olarnıñ mudafaası bir yerde zayıflaşqanını is etmedik… Qorqularım çoq, ve «Vagner» olardan biri. Ve tek olar degil. Bunı şimdi aytıp başlasaq, başım aylanır… Bizim vazifemiz – eñ yaramay stsenariyge azır olmaq. Ola bilecek aqibetlerni eksiltmege tırışacaqmız», – dedi Ukrayına Silâlı quvetleriniñ baş komandanı.
İyünniñ 16-nda Rusiye prezidenti Vladimir Putin Peterburg iqtisadiyat forumında çıqışta bulunıp, Rusiye özek silâsını qullana bile, dep ayttı – «devletniñ bar oluvı içün bir telüke olsa».
ABD prezidenti Joe Biden iyünniñ 19-nda Kreml yolbaşçısı Vladimir Putin Ukrayınağa qarşı cenkte taktik özek silâsını qullanmağa emir ete bilecegini «kerçek» bir telüke dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
