Ukrayina Silâlı Quvetleriniñ baş komandanı general Valeriy Zalujnıy, Ukrayina arbiyleri Rusiye ava nişanlarınıñ tahminen 80 faizini yoq eteler, dep bildirdi.
"Büyük istilânıñ 9 ayı içinde Arbiy ava quvetleriniñ radio tehnika askeriy quvetleri duşmannıñ 240 binden ziyade ava nişanını aşkâr etti ve izledi. Tahminen 80 faizi ateş silâlarımız tarafından mahv etile. Bular yüz biñlernen qurtarılğan ömürler, saqlanılğan infraterkip. Ve bu askerlerimizniñ yüksek becerisiniñ bir köstergiçidir", -dep yazdı o Facebook saifesinde.
General Ukrayina Silâlı Quvetleriniñ Arbiy ava quvetleriniñ radio tehnika ordusınıñ arbiylerini ve hadimlerini hayırladı.
Ukrayına Silâlı quvetleri Baş ştabınıñ malümatına köre, fevralniñ 24-nden Rusiyeniñ ğayıpları böyle oldı: 280 uçaq, 261 vertolöt, 1 562 operativ-taktik seviyeli uçucısız cihaz ve 531 qanatlı raketa.
Noyabrniñ 23-nde Rusiye Kıyiv ve diger Ukrayina şeerlerine qarşı kene raketalarnen ücüm etti.
Ukrayinanıñ energetika nazirligi, noyabrniñ 23-nde Rusiyeniñ raketa ücümi bütün atom elektrik stantsiyalarınıñ, issilik ve gidroelektrik stantsiyalarnıñ çoqusınıñ kesilmesine sebep olğanını bildirdi.
Moskva bir sıra delil olğanına baqmadan, vatandaşlarğa qarşı ücüm etkenini inkâr ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
