Ukrayına arbiyleri Qırım ve Donbasnıñ işğalden azat etilüvi içün kerek olğan şeylerni bile, lâkin «tez yapılmaycaq çoq iş bar». Bu aqta Ukrayına Silâlı quvetleriniñ baş komandanı Valeriy Zalujnıy mayısnıñ 12-nde aqşam jurnalist Dmıtro Komarovğa intervyüda bildirdi.
«Qırımnı, Donetsk, Lugansk vilâyetlerini azat etmek içün kerek olğan şeylerni bilemiz. Amma tez yapılmaycaq çoq iş bar», – dep ayttı Zalujnıy.
Bunıñnen beraber, Zalujnıy Qırım, Donetsk ve Lugansk vilâyetleri azat etilecek, dep eminliknen bildirdi.
Soñki aftaları Ukrayınanıñ qarşı ücümi aqqında daa çoq aytalar. Vaqtı ve yeri aqqında bir şey belli degil. Bazıları Kyivniñ maqsadı Donbas, digerleri ise Qırım ola, dep aytalar.
Ukrayına Mudafaa nazirligi Baş istihbarat idaresiniñ reberi Kırılo Budanov Ukrayına Silâlı quvetleriniñ qarşı ücümine azırlıq «planğa köre kete», amma yerine ketirüv planlarını aydınlatmaycaq, dep bildirgen edi.
Qırım.Aqiqat, Rusiye ordusı yañı inşaatlarnı qurmağa ve Qırım şimalinde okoplarnı qazmağa devam ete, işğal altındaki yarımadada arbiy ve strategik obyektlerni imaye ete, dep bildirgen edi.
ABD Ukrayına Devlet departamentiniñ sabıq mahsus vekili Kurt Volkerniñ fikirince, Ukrayına Rusiye Federatsiyasınen yarımadanıñ logistik bağlarını qoparıp, şimdi Qırımnı Rusiyeden izolâtsiya etmeli. Bu, Qırımnıñ arbiy quvetsiz qaytarıluvına doğru ilk müim adım olacaq.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
