«Qırım birdemligi» birleşmesi bildirgenine köre, dekabrniñ 25-nde Qırımda Rusiyede qabaatlav tarafı 13 yıldan 19 yılğa qadar apis cezaları berilmesini istegen Qarasuvbazardaki «Hizb ut-Tahrir davası» mabüsleriniñ qorantaları fleşmob başlattı.
«İnsanlar Facebook içtimaiy ağındaki saifelerinde Enver ve Riza Ömerovlar, Ayder Cepparovğa qol tutuv sözlerinen fotoresim paylaşıp, olarnı mahkeme salonında azat etmege talap ete», – dep bildire faaller.
Rostov-na-Donu Cenübiy okrugınıñ arbiy mahkemesi oturışuvında dekabrniñ 22-nde prokuror Qarasuvbazardaki «Hizb ut-Tahrir davasınıñ» mabüsi Enver Ömerov içün 19 yıl apis cezası berilmesini istey, sert rejimli koloniyada qalması, üç yılnı apishanede keçirmesini talap ete, azat etilgen soñ ise 1 yıl ve 9 ay sıñırlav olması talap etildi. Oğlu Ömerov Riza içün – sert rejimli koloniyada qalmasınen 13 yıl, 3 yıl apishanede qalması, azat etilgen soñ ise 6 ay sıñırlanması. Cepparov Ayder içün – sert rejimli koloniyada qalmasınen 18 yıl, 3 yıl apishanede qalması, azat etilgen soñ 1 yıl ve 2 ay sıñırlanması talap etildi.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
