Rostov-na-Donu Cenübiy okrugınıñ arbiy mahkemesi tarafından 22 yılğa azatlıqtan marum etilgen Aqyar sakini Nadejda Grekovanı Ulan-Ude (Bürtiya Cumhuriyeti, RF) 7-nci tüzetüv koloniyasına etap ettiler. Bunı Qırım aq qorçalayıcı gruppası bildire .
Aq qoruyıcılarnıñ malümatına köre, Grekovanı "qattı şartlar bölügi"nde tutalar.
"O, qapalı bir yerde buluna, koloniyada serbest areket etmege imkânı yoq. Künde bir kere yürmege, amma eki ayda bir kere telefon açmağa izin berile", — dep qayd ettiler KPGde.
Teşkilâtta qayd ettiler ki, Qırımlığa kimse kelmey, çünki koloniya tuvğan işğal etilgen Aqyardan tahminen yedi biñ kilometr uzaqlıqta buluna.
2025 senesi Oraqnıñ 31-nde Rusiye mahkemesi 39 yaşındaki Nadejda Grekovanı "terakt teşkil etüv", "patlav azırlavı", "devlet hainligi" ve "terror faaliyetini kerçekleştirmek maqsadınen oquvdan keçüv" qabaatlavlarında suçlu tanıdı. Rusiye telükesizlik hadimleriniñ versiyasına köre, o, Aqyarda Rusiye Qara deñiz flotunıñ arbiy hızmetçisine qarşı patlav azırlanmasında iştirak etti.
Aq qorçalayıcılar Rusiye quvetçileri tarafından açılğan devlet hainligi, işbirlik ve casuslıq aqqında davalarnıñ sayısı bir qaç qat artacaq, dep tahmin ete.