Ukrain faali Vladimir Baluhnı Aqmescit SİZOsında cemaat qorçalayıcısı, Arhiyepiskop Kliment ziyaret etti, dep bildire sentâbrniñ 17-nde Qırım.Aqiqat mühbiri. Arhiyepiskopnıñ aytqanına köre, Baluh yüregi pek ağırğanını ayta, amma açlıqnı devam ete. O, faalniñ Aqmescit SİZOsında köteklenmesi aqqında kelgen haberni izaatlamadı. Arhiyepiskop Klimentniñ qayd etkenine köre, ilk-evelâ Baluhtan alğan malümatnı advokatınen muzakere etmeli.
«Volodânı kördim, laf ettik, sağlığını sorap, destek mektüplerini berdim. Advokatnen laf etken soñ bunıñnen bağlı resmiy beyanat yapacaqmız. Volodâ yüregi ağırğanını ayta, bazı vaqıtları bu ağrı oña nefes almağa bermey ve qustıra», – dep tarif etti Arhiyepiskop Kliment.
Baluh eki yerli kamerada bulunğanını ve açlıqnı devam etecegini bildirdi. Arhiyepiskop Kliment qayd etti ki, faalnen laf etkende esasen diniy meselelerni köterdi.
«Volodânı ukrain kilsesine tomos berilmesi meraqlandıra, «qurtuluv» ne olğanını laf ettik. Men dua oqudım, oña yağ sürttim. Çoqtan bergenim dualar kitabını oquğanını ayttı», – dep qoştı papaz.
Qırımda apiste tutulğan ukrain faali Vladimir Baluh 2018 senesi martnıñ 19-nda başlağan müddetsiz açlıqnı devam ete. Bir aydan berli bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi.
Sentâbrniñ 14-nde Qırımtatar Milliy Meclisiniñ reis muavini Ahtem Çiygoz Vladimir Baluhnı köteklegenler, dep bildirdi. Onıñ aytqanına köre, Aqmescit SİZOsınıñ reberi Sergey Berejnoy mabüsni kameradan çıqartıp, tiz çökmege talap etti. Amma talabı yerine ketirilmegen soñ Baluhnı «küçnen betonğa yatqızıp, ayaq, ciger ve başını urğanlar».
Sentâbrniñ 15-nde Rusiyeniñ cezalarnı yerine ketirüv federal hızmetiniñ Qırım idaresi Baluhnıñ köteklenmesi aqqında malümat doğru olmağanını bildirdi.
Ukraina Yuqarı Radasınıñ insan aqları vekâletlisi Lüdmila Denisova Rusiye akimiyetinden Vladimir Baluhnı körmek içün Aqmescit SİZOsına kirmesine imkân bermesini talap etti.
İyülniñ 5-nde Rusiye kontrol etken Aqşeyh rayon mahkemesi ukrain faali Vladimir Baluhqa 5 yıl apis cezası ve 10 biñ ruble (4 biñ grivna) para cezasını tayin etti.
FSB Vladimir Baluhnı 2016 senesi dekabrniñ 8-nde tuttı. FSB hadimleri Vladimir Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
