Mayısnıñ 6-na keçer gecesi Moskvağa Ukrayina uçucısızları ücüm etti, parçaları Kaşirskoye şossesindeki mesken ev yanında tüşti, dep bildirdi Rusiye paytahtınıñ şeer yolbaşçısı Sergey Sobânin.
Onıñ aytqanına köre, parçalar tüşken yerde ciddiy zarar ya da yaralanğanlar yoq. «Baza» ve «Ostorojno, novosti» Telegram kanalları adise yerinden videolar derc etti.
Gece Sobânin uçucısızlarnıñ ücümi aqqında beş kere haber etti. Rusiye Mudafaa nazirligi ava mudafaa vastaları 11 regionda, şu cümleden sıñırdaki Samara, Lipetsk, Penza, Vladimir ve Kaluga vilâyetlerinde 105 uçucısıznı yoq etti, dep bildirdi. Müessise malümatına köre, Moskva vilâyetinde 19 dron urıp tüşürildi.
Gece dört Moskva ava limanınıñ işi vaqtınca sıñırlandı – Şeremetyevo, Domodedovo, Vkunovo ve Jukovskiy. Kaluga, Samara, İvanovo, Nijniy Novgorod, Yaroslavl, Saratov, Volgograd, Qazan ve Nijnekamskte de ava limanları qapatıldı, dep bildirdi «Rosaviatsiya» reisi Artem Körenâko.
Mayısnıñ 9-nda Moskvada Avropada Ekinci cian cenki bitkenine 80 yıl tolğanı munasebetinen parad keçirilecek. Aprelniñ soñunda Ukrayina prezidenti Volodımır Zelenskıy Kreml arbiy paradnıñ havfsızlığı aqqında «boş yerde qayğırmay», dep bildirdi. Soñra başqa memleket liderleriniñ Moskva ziyaretlerini izaatlap, Ukrayina «Rusiye Federatsiyasında olğan şeyler içün mesülietli olamaycağını» da ayttı.
Mayısnıñ 5-nde Moskvada paradnıñ ava qısmınıñ repetitsiyası olıp keçti, qullanıcılar ise mobil operatorlarnıñ işindeki toqtavlarnı şikâyet etti. Fevqulâde vaziyetlerniñ tenbi ve yoq etilmesi yekâne sisteması «Ğalebe kününe bağışlanğan tedbirlerniñ havfsızlığını temin etmek maqsadınen internet resurslarına kiriş sıñırlana bile», dep qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
