Keriç (Qırım) köprü Rusiye logistikasını temin etmek içün yeterli degil, lâkin Kreml yolbaşçısı Vladimir Putin içün timsaliy emiyeti bar, dep bildirdi Ukrayina Mudafaa nazirliginiñ Baş istihbarat idaresiniñ temsilcisi Andriy Yusov.
"Biz Qırımğa demiryolnıñ qurulması aqqında haberlerni kördik ve eşittik. Bunen beraber, yalıñız arbiy teminlev noqta-i nazarından, hususan Ukrayinanıñ bu yönelişte muvafaqiyetli areketlerinden soñ, köpür az, amma timsaliy olaraq - o, kerçekten de, Putin içün müim olıp qala. Bu kerçek", - dep qayd etti o, ukrayin milliy tele marafonı efirinde.
Rostov-Qırım demiryolnıñ qurucılığı ne basamaqta, degen sualge GUR vekili: "Bu ciddiy qurucılıq basamağıdır. Bir qaç aydan soñ neticelerni körmek mümkün olacaq" dedi.
Bundan evel The Guardian, GUR menbalarına atıf etip, Ukrayina istihbaratçıları yaqın aylarda Keriç köprüne üçünci ücümni keçirip, onı bozacaq olalar, dep yazdı.
Keriç köprü ilhaq etilgen Qırımnı Rusiye ile bağlay. 2022 senesi oktâbr ayında Qırım (Keriç) köpründe patlav yüz berdi. 2023 senesi iyülniñ 17-nde Keriç köpründe daa bir patlav oldı. Rusiye akimiyeti patlavlarda Ukrayina ordusını qabaatlay ya da olarnı talimler dep adlandıra. Kıyiv tek bazı ücümlerde iştirak etkenini tasdıqlay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
