Qırımnıñ birinci ve soñki prezidenti Yuriy Meşkovnı çarşenbe künü, oktâbr 2-sinde Aqmescitte defin etecek olalar. Bunı Qırım.Aqiqatqa rusiye tarafdarı olğan Qırım cemiyeti faali Sergey Akimov haber etti.
"Cenaze saat 12-de çarşenbe künü Aqmescit şeerinde yañı "Abdal" mezarlığında olacaq. Yuriy Meşkovnı birinci apayı yanında defin etecekler. Şimdi cemaat vedalaşuvını keçirmek içün, Sergey Aksönovnen añlaşmağa tırışacaqmız", - dedi Akimov.
Onıñ aytqanına köre, Yuriy Meşkovnıñ cesedini Qırımğa sentâbr 30-ında ketirecekler.
Haber etilgeni kibi, Qırımnıñ birinci prezidenti Yuriy Meşkov 74 yaşında sentâbr 29-ında Krasnogorskta vefat etti.
Sentâbrniñ 1-nde Yuriy Meşkovnıñ qızı Marianna babası insultqa oğrağanını Facebook saifesinde yazğan edi. Onı suniy komağa kirsetken ediler. Uyatqanda ise o, «laf etmey ve qıbırdamay edi».
1990-ıncı yıllarnıñ başında Yuriy Meşkov Qırımnıñ Cumhuriyet areketi ve «Rusiye» Blokunıñ yolbaşçısı edi, olar yarımadanıñ Ukrainadan mustaqil olmasına ve daa soñra Rusiye Federatsiyasına qoşulmasına qoltutqan ediler.
1994 senesi Qırımnıñ ilk ve soñki prezidenti olaraq saylanğan edi.
«Rusiye» blokundaki bölünüv ve Ukraina akimiyetiniñ areketleri neticesinde Rusiyege ketmege mecbur edi. Yarımada işğaline qadar anda yaşağan edi. Şimdi Kreml kontrolindeki Qırım akimiyetine muhalif ola.
