Ukraina Yuqarı Radasına işğal etilgen Qırım ve Aqyarnı esas Ukrainadan suvnen temin etüv laflarınen bağlı beyanat aqqında qarar leyhası kirsetildi. Vesiqa martnıñ 12-nde Ukraina parlamentiniñ saytında qayd etildi.
Parlament saifesinde derc etilgen malümatqa köre, işbu beyanat baqıluvınıñ teşebbüsçileri «Avropa birdemligi», «Ses» ve «Halq hızmetçisi» ukrain firqalarınıñ 28 deputatı ola.
«Ukraina Yuqarı Radası, vaqtınca işğal altında qalğan Qırım Muhtar Cumhuriyeti ve Aqyar şeerini Şimal-Qırım kanalı ya da başqa bir yolnen suvnen temin etüv ıntıluvları, ya da böyle ihtiyac aqqında laflar Ukrainanıñ halqara vazifelerine zıt kele, insan, azlıq ya da tamır halqlarnıñ aqlarını qorumay ve Ukrainanıñ devlet menfaatlarına zıt kele, Ukraina suvereniteti, topraq bütünligi ve toqunılmamazlığı, mudafaa küçü, devlet ve iqtisadiy telükesizligine zarar ketire, dep bildire», – dep aytıla beyanatta. Onıñ tolu metnini «Ses» firqası derc etti.
Martnıñ 12-nde Rusiye kontrolindeki Qırım ükümetiniñ reisi Yuriy Gotsanük suv hatlarınıñ eskirüvi sebebinden yarımadada içme suvınıñ 50 fayızı coyula, dep bildirdi.
Martnıñ 5-nde Ukraina baş naziri Denis Şmıgal «Akimiyet aqqı» («Pravo na vladu») yayını vaqtında onıñ Nazirler şurası «Qırımdaki ukrainalılar içün suvnı qapatmaycaq» ve suv berilmese, «gumanitar felâket ola bile», dep ayttı.
Daa soñra Facebookta yazğanına köre, Ukraina akimiyeti yarımada işğalden qurtarılğanına qadar Qırımğa suv berip olamay, çünki «insanlarğa ve arbiy bazalarğa (Rusiyege ait – QA) ketecek suvnı bölmege çare yoq».
Rusiye kontrolindeki Qırım yolbaşçısı Sergey Aksenovnıñ fikirince, Ukraina Qırımğa suv berüv meselesini «şantaj silâsı» olaraq köre.
Martnıñ 6-nda Tış işler naziri Dmıtro Kuleba, Kyiv, işğal etilgen Qırımğa Dnipro suvını berüv imkânlarını baqmay, dep ayttı.
Ukraina akimiyeti, işğal altındaki Qırımnıñ suv teminlevi yalıñız yarımada işğalden qurtarılğan soñ ğayrıdan tiklenecek, dep çoq bildirgen edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
