Ukraina halq deputatı Aleksey Gonçarenko Yuqarı Radada yarımada işğalden qurtarılğanına qadar «vaqtınca işğal etilgen Qırım Muhtar Cumhuriyeti ve Aqyar şeerini Şimaliy-Qırım kanalı üzerinden suv bermek yasağı» aqqında qanun leyhasını qayd etti, dep haber etile parlament saytında.
«Suvnıñ vaqtınca işğal etilgen topraqlarğa berilüvi işğalci devlet içün Qırımnı baquv masraflarını eksiltecek, bu da Qırım yarımadasınıñ Rusiye terkibine integratsiyasına yardım etecek. Qalğan para işğalci mahsus ve uquq qoruyıcı organlarına yañı imkânlarına masraf etilecek. «Politsiya devletiniñ» şekillenmesi alında Rusiye işğalci memuriyetiniñ Ukraina vatandaşlarına qarşı repressiyaları Qırımda artacaqtır. Neticede – Qırım yarımadasınıñ demografik qurulışı deñişmege devam eter», – dep aytıla vesiqanen beraber berilgen tezkerede.
Qayd etilgenine köre, işğal altındaki yarımadağa Şimaliy-Qırım kanalı üzerinden suv berilmesiniñ sıñırlavları «Qırım yarımadası ve Qara ve Azaq deñizlerinde Ukraina devlet suvereniteti ğayrıdan tiklengenine» qadar qalacaq.
«Ukraina Qırımnı suvnen teminlev sıñırlavlarını belgilemeli, Qırım yarımadası ve Qara ve Azaq deñizlerinde Ukraina devlet suvereniteti ğayrıdan tiklense, tek o vaqıt suv berile bile. Qanun leyhamnıñ maqsadı da bu normalarnı qanunlarda qayd etmektir», – dep yazdı Aleksey Gonçarenko Facebook saifesinde.
Noyabr ayında Ukraina prezidenti ofisiniñ reberi Andriy Yermak, işğal etilgen Qırımda yaşağa insanlarnıñ ihtiyaclarına suv yete, dep bildirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
