Ukrayina Yuqarı Radası tamır qırımtatar halqınıñ genotsid qurbanlarına ürmet aqqında halqara toplulıqqa muracaatnı qabul etti. Mayısnıñ 14-nde alınğan qararğa 272 deputat qoltuttı, dep bildirdi Ukrayina halq deputatı Tamila Taşeva Facebook saifesinde.
Vesiqa çetel ükümetleri ve parlamentlerini 1944 senesi qırımtatar sürgünligini genotsid olaraq tanımağa, işğal etilgen ve Rusiye tarafından qanunsız ilhaq etilgen Qırımda aq ve serbestlikni bozuvğa cevap bermek içün ğayretni birleştirmege çağıra.
Taşevanıñ qayd etkenine köre, qarar sürgünlikniñ 82 yılı arfeyesinde qabul etildi.
"Biz dünyağa biñlernen qırımtatarı zornen sürgün etilgen ve sovetler akimiyeti tarafından genotsidke oğratılğan 1944 senesiniñ facialı adise-vaqiaları aqqında er yıl hatırlatuv adetini devam ettiremiz. Eñ qorqunç şey bu ki, repressiyalar şimdi de devam ete. Kommunistik totalitar rejimi halqımıznı yoq etmege tırıştı, soñra ise şeer ve köylerniñ adlarını deñiştirip, hatıranı silmege istedi. Bugün Rusiye Federatsiyası bu kolonial siyasetini devam ettirip, qırımtatarlarnıñ taqibi, Meclis yasağı ve kimligimizni yoq etmek içün insan aqlarınıñ muntazam sürette bozuluvını qullana", – dep yazdı Taşeva.
Parlament vekilleri halqara toplulıqnı aşağıdakilerge çağıra:
- Qırım ilhaqını tanımama siyasetine sadıq qalmaq;
- İşğalci rejimniñ ayırım areketlerini takbih etmek;
- Avropa insan aqları mahkemesi ve BM insan aqları komitetiniñ Rusiyege qarşı sanktsion ve siyasiy basqısını quvetleştirmek;
- Ukrayinalı siyasiy mabüslerniñ azat etilüvine yardım etmek;
- Ukrayinağa qarşı istilâ cinayeti mahsus tribunalını başlatuvğa qoltutmaq.
Qırımtatar Milliy Meclis reisi Refat Çubarovnıñ qayd etkenine köre, rey berüv neticeleri deputatlarnıñ "sarsılmağan birligini" köstere.
"Bu qarar qırımtatar halqınıñ facialı tarihına yüksek ürmet timsali ve halqara ortaqlarğa tam bir işaret ola: Qırım ve insanları oğrunda küreş – adaletli dünya içün küreşimizniñ ayırılmaz parçasıdır", – dedi Çubarov.
Bugünki künde 1944 sürgünligini Latviya, Litvaniya, Kanada, Poloniya, Estoniya, Çehiya ve Felemenk genotsid olaraq tanıdı. Lüksemburg parlamenti qırımtatar halqınıñ sürgünligi ve zemaneviy aq bozuluvını takbih etti.