Ukraina em Qırımnıñ işğali meselesinde, em de Donbastaki cenkte suverenitetini ve topraq bütünligini qorumaq mecburiyetindedir, amma aynı zamanda "bir devlet olaraq" qalmağa devam ete. Bunı Ukraina Yuqarı Radasınıñ spikeri Dmıtro Razumkovnıñ Ukraina Mustaqilligi kününe bağışlanğan bildirüvinde aytıla.
Tam metin Ukraina parlamentiniñ saytında yayınlanğan.
«Bugün Ukraina zemaneviy tarihında meşur bir bayramnı – Mustaqilliginiñ yıldönümini qayd ete. 30 yıl evel Yuqarı Rada devletimizniñ mustaqilligini ilân etken Aktnı qabul etti. Yañı Ukrainıñ qurulmasınıñ başlanğıç noqtası bu qarar oldı. Bu yıllar içinde memleketimizniñ başı çoq şey keldi. Parlaq ğalebeler ve teessüf ki, mağlübiyetler oldı. Bugün em Qırımnıñ işğali meselesinde, em de Donbastaki cenkte suverenitetini ve topraq bütünligini qorumaq mecburiyetindemiz. Kimerde ne qadar qıyın olsa da, unutmamaq kerekmiz ki, ukrainler er angi qıyınlıqlarğa baqmadan, tarihında er zaman ileri ketmek ve daa güzel kelecek içün küreşte küç tapa ediler. Bizni pek çoq şey birleştire. Ukraina bu bir devlet. Ğarptaki ve Şarqtaki, Cenüpteki ve Şimaldeki ukrainler serbest ve inkişaf etken memlekette yaşamağa tıraşa eidiler ve tırışmağa devam eteler», – dedi Razumkov.
Avgustnıñ 24-nde Ukraina Mustaqilliginiñ 30-ncı yıldönümini qayd ete.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
