Ukrayina Yuqarı Şurasında işğalge qarşı Qırım tirenüvi ve Qırımda qırımtatarlarğa qarşı yapılğan basqılarğa bağışlanğan sergi keçirile. Meclis binasında derc etilgen fotoresimler Qırım.Aqiqat jurnalistleri tarafından 2014-2024 seneleri yapılğan.
Sergilengen işler arasında — sabıq siyasiy mabüs Oleğ Sentsovnı deñiştirüv neticesinde azat etilgen mahküm etilgen qırımtatar faali Nariman Celâlnıñ, qanunsız sürette mahküm etilgen Qırım.Aqiqat frilanser Vladislav Yesipenkonıñ portretleri bar.
Sergide Ukrayina mudafaa quvetleriniñ ücümi neticesinde 2022 senesi aprelniñ 14-nde batqan "Moskva" kreyseriniñ soñki fotoresimi taqdim etildi.
2014 senesi fevralniñ 20-nde Ukrayinağa qarşı Rusiye istilâsı başlandı. Bu künü Qırımğa Rusiye ordusınıñ Rusiye Federatsiyasınıñ Qara deñiz flotunıñ bölükleriniñ rotatsiyası şeklinde köçürüvi başlandı.
Qırım şeerleriniñ soqaqlarına RF arbiy hızmetçileri fevralniñ 27-nde çıqtı, anda eki silâlı belgisiz şahıslar (soñra belli olğanı kibi - Rusiye spetsnazları edi) Yuqarı Rada ve QMC Nazirler Şurasınıñ binalarını zapt ettiler. Ertesi künü, fevral 28-de, Rusiye arbiyleri Aqmescit Halqara ava limanını blok etip, onı zapt ettiler.
Aynı yıl martnıñ 16-nda Qırım ve Aqyar territoriyasında yarımadanıñ statusı aqqında referendum olıp keçti, onıñ neticelerine köre Rusiye Qırımnı öz terkibine kirsetti.
Bundan soñ yarımadada ukrayin tarafdarları kütleviy surette taqip etile, bunı kütleviy haber vastalarında olğan maqaleler, Ukrayina akimiyeti ve aq qorçalayıcı teşkilâtlarınıñ beyanatları köstere.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
