Ukraina Yuqarı Radası, Ukraina ve Rusiye arasındaki dostluq, işbirlik ve ortaqlıq Muqavelisiniñ amelini toqtatmaq teklifine qoltuttı. Bu qararğa 277 halq mebusı rey berdi.
Qanun leyhasına binaen,dostluq muqavelesi 2019 senesi aprel 1-inden toqtatılacaq.
Ukraina ve Rusiye arasında dostluq muqavelesi 1997 senesi imzalanğan edi ve o alâ daa amelde. Başqalarnıñ arasında, muqavele tarafları “biri biriniñ territorial bütünligini ürmet etip, aralarında olğan sıñırlarnıñ bozulamamasını tasdıqlay” ve “suveren musaviylikniñ eki taraflı ürmeti, sıñır bozulmaması, davalarnıñ barışıqlı çezmesi, küç qullanmaması ve küçnen qorquzmaması printsipleri esasında biri birinen munasebet qura”maddeleri de bar.
Vesiqa müddeti on yıl edi, ondan soñ. 2008 senesi onıñ ameli avtomatik uzatıldı.
Sentâbrniñ soñunda Ukraina prezidenti Petro Poroşenko, BMT baş katibi Antoniu Guterreşke(António Manuel de Oliveira Guterres) Rusiye ile dostluq muqavelesini uzatlaştırmamaq Ukraina qararınen notanı berdi.
