Ukrayina Yuqarı Radasında Rusiye Federatsiyasında tutulğan ukrayin jurnalistlerini (şu cümleden vatandaş jurnalistlerini de) Ukrayinağa qaytarmaq qararını qabul ettiler, olarnıñ arasında Qırım.Aqiqatnıñ frilanseri Vladislav Yesipenko ve qırımlı vatandaş jurnalisti İrına Danılovıç bar.
Bu aqta Facebook saifesinde Ukrayina halq deputatı Yevgeniya Kravçuk bildirdi.
"Bugün Ukrayina parlamentiniñ müim qararları arasında – Esir alınğan ve qanunsız tutulğan jurnalistlerniñ Ukrayinağa qaytarıluvı aqqında qarar. Onıñ yazıluvına men de qoşuldım. 293 rey", – dep yazdı Kravçuk.
Halq deputatınıñ aytqanına köre, Ukrayina Yuqarı Radası bu qararnen halqara ortaqlarğa muracaat etip, esirlerni ve qanunsız tutulğan jurnalistlerni qaytarmaq içün Rusiye Federatsiyasına siyasiy-diplomatik basqını quvetleştirmege çağırdı.
Kravçuk, bu meseleni PACE çerçivesinde, hususan komitet diñlevlerinde kötermege niyetlengenini bildirdi. Avropa Şurası Ofisi ile Ukrayinada tematik tedbirlerniñ teşkil etilmesi planlaştırıla. O, ukrain jurnalistleriniñ tezce qaytması içün Ukrayina ortaqlarınıñ kerekli reaktsiyasına işana.
"Bizge ukrayin mediacılarınıñ qanunsız apiske alınuvınıñ 26 tasdıqlanğan adisesi aqqında belli. Olarnıñ arasında Vladislav Yesipenko, Dmitriy Hilük, İrına Danılovıç, Maksim Butkeviç. Olarnı tezce qaytarmaq içün ortaqlarımıznıñ kerekli reaktsiyasına ümüt etemiz", - dep ayttı Kravçuk.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
