Bugün, dekabrniñ 12-nde, Ukraina Yuqarı Radası “Donetsk ve Lugansk vilâyetleriniñ ayrı bölgelerinde yerli özidare organlarınıñ mahsus nizamı aqqında” qanunına deñiştirmeler kirsetip, onı 2020 senesi dekbarniñ 31-ine qadar daa bir yılğa uzattı. Bu deñişmeler içün "Ğolos" ve "Batkivşçina" partiyalarınıñ bütün azaları rey bermedi, dep bildire Azatlıq Radiosı.
Ukraina Yuqarı Radası, Donetsk ve Lugansk vilâyetleriniñ ayrı bölgeleriniñ mahsus statusı aqqında qanunnı 2014 senesi üç yıllıq müddetke qabul etti.
2017 senesi oktâbr ayında parlament, qanunnı daa bir yılğa uzatqan edi, 2018 senesi oktâbrde ise - daa bir yılğa - 2019 senesi dekabr 31-ine qadar. Qanunnıñ şimdiki uzatmasını "Halq hızmetçisi" fraktsiyasınıñ reisi David Arahmaniya teklif etti.
"Normandiya dortü" - Ukraina, Rusiye, Frenkistan ve Almaniya - liderleriniñ üç yıl içinde ilk körüşüvi Parijde dekabrniñ 9-ında keçe. Ukraina prezidenti Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin ile eki taraflı körüşüvler keçirdi.
Ukraina prezidenti Volodımır Zelenskıy, Parijde dekabr 9-ında keçken "Normandiya formatı"ndaki körüşüvden soñ matbuat konferentsiyasında çıqışta bulunğanda, Ukraina ve onıñ halqı içün bozulmaz printsiplerni belgiledi. Hususan, o, Donbass ve Qırım Ukrainanıñ bir parçası olğanını qayd etti.
Körüşüvden soñ Ukraina prezidenti Volodımır Zelenskıy, qanunnı daa bir yılğa uzatmaq mümkün, dep ayttı.
