Ukraina Yuqarı Radası saat 16-da Milliy telükesizlik ve mudafaa şurasınıñ (RNBO) Ukrainada cenk vaziyetini ilân etme meselesinen bağlı nevbetten tış qapalı oturışuvğa toplana. Bu aqta Ukraina parlamentiniñ spikeri Andriy Parubiy bildirdi.
«Ukraina Arbiy deñiz quvetleriniñ gemilerine Rusiye arbiyleri ücüm etti. Rusiye istilâcısınıñ bu areketleri BM Nizamnamesini, BM deñiz uquqı konventsiyasını bozmaqta. Bütün dünya Rusiye cenk istilâsınıñ delillerini kördi, artıq bunı kimse inkâr etemez. Dünya Rusiye Cenk gemileriniñ Ukraina gemilerine ücüm etkeniniñ videosını kördi», – dedi Parubiy.
Onıñ bildirgenine köre, Ukraina milliy telükesizlik ve mudafaa şurasınıñ (RNBO) qararını ve Ukraina prezidentiniñ muracaatını qabul etmek içün saat 16:00-da Ukraina Yuqarı Radasınıñ nevbetten tış toplaşuvı olacaq.
Poroşenko, RNBOnıñ Ukrainada cenk vaziyetini ilân etmek qararını işke tüşürecek buyruqnı imzaladı.
Noyabrniñ 26-nda gece Ukraina milliy telükesizlik ve mudafaa şurasınıñ toplaşuvında cenk vaziyetini ilân etmek içün azırlıq körmege qarar alındı.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı.
Ukraina prezidenti Petro Poroşenko Kremlden Keriç boğazında tutılğan Ukraina deñizcileri ve gemilerini acele azat etmesini talap etti.
Tünevin Rusiye Ukraina arbiy gemileri Keriç boğazından keçmesin dep, Keriç boğazını vatandaş gemileriniñ keçmesi içün de qapattı. Ukraina Tış işler nazirligi noyabrniñ 25-nde olğan adiseden soñ Rusiyeniñ Qara ve Azaq deñizlerinde yapqanlarını tenqit etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.
