Link açıqlığı

Saatnıñ esas haberi

Qırım: oktâbrniñ 25-nde tutulğan faal Yunus Bulatovğa 10 biñ ruble para cezası berildi


Rusiye kontrolindeki Aqmescitniñ Merkeziy rayon mahkemesi faal Yunus Bulatovnı Rusiye Memuriy uquq bozuvları kodeksiniñ 20.2.2 memuriy maddesine istinaden 10 biñ ruble para cezasını berdi. Bu aqta cemaat imayecisi Ayder Suleymanov Qırım.Aqiqatqa bildirdi.

O, Bulatovğa qarşı dava birinci kere memuriy bozuv olmağanı içün toqtatılğan edi, dep hatırlattı. Qabaatlav bergen istinaftan soñ Qırım Yuqarı mahkemesi davanı yañı baqıluvına berdi.

Suleymanov qayd etkenine köre, bugün oturışuv bir qaç saat keç başladı, çünki mahkemege dava protokolını tizgen polis hadimi çağırıldı.

«Bu davanıñ protokolını tizgen hadim sorğuğa çekildi. Yefimçuk. Bu hadim Bulatov o künü o yerde olğanını, Bulatov Yunus vatandaşlarnıñ ya da naqliyatnıñ keçmesine keder etken cemaat nizamınıñ bozuluvında iştirak ettimi aytıp olamadı. Bulatovnıñ maskası bar edimi-yoqmı, mesafeni bozdımı-yoqmı aytıp olamadı. Yani bu suallerge polis hadimi «Körmedim» ya da «Hatırlamayım. Amma mesüliyetke çekilgen insanlar arasında edi, dep aytam», dep cevap berdi», – dedi Suleymanov.

O, uquq qoruyıcılar istinafına qoşqan video mahkemede baqıldı, dep qoştı.

«Bu videoda Bulatov Yunusnen bağlı bir malümat yoq, mahkemede bunı da ayttıq. Bundan ğayrı, memuriy uquq bozuluvı protokolını çıqarmağa rica ettik, çünki tizilgende hatalar yapıldı. Lâkin mahkeme, fikirimizce, evelden qarar aldı. Mahkemeniñ maqsadı – cezalamaq edi. Delillerimizni qabul etmeyip, Bulatov Yunusqa 10 biñ ruble para cezasını berdi», – dep ayttı cemaat imayecisi.

Oktâbrniñ 25-nde Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq insannı tuttı.

XS
SM
MD
LG