«Batkivşçına» ukrain firqasınıñ lideri Yuliya Tımoşenko aprelniñ 2-nde Ukraina prezidenti saylavlarınıñ birinci tur neticelerini mahkemede şikâyet etmege ya da bu neticelerge qarşı tarafdarlarınıñ narazılıq aktsiyalarını teşkil etmege azır, dep bildirdi. O, ekinci turda namzetlerden iç birisine qoltutmaycağını bildirdi.
«Küreşimiz bitmedi. Bu qaçırılğan bir fırsat. Yañı kursnı yerine ketirmek imkânımız qala – nevbetteki parlament saylavlarıdır», – dep bildirdi Tımoşenko, dep haber ete Azatlıq Radiosı.
«Batkivşçına» lideri Ukraina prezidenti Petro Poroşenko ve taqımını sahtelevde qabaatladı.
«Ukrainada körgen neticelerimizge yol bergen tehnologiyalar qullanılğan edi – 39 namzet qayd etildi, memuriy resurs qullanıldı, bu bir… Avropağa qoltutqan, muhalifet küçleriniñ reylerini dağıtıp oldılar», – dep israr ete Tımoşenko.
Merkeziy saylav komissiyasınıñ malümatına köre, protokollarnıñ 97,38%-ı teşkerilgen soñ Yuliya Tımoşenkoğa 2 mln 470 biñ insan (13,38%), Petro Poroşenkoğa – 2 mln 940 biñ saylayıcı (15,92%) rey berdi. Volodımır Zelenskıy lider olıp qala, oña saylayıcılarnıñ 30,26%-ı (5 mln 587 biñ insan) rey berdi. Protokollarnıñ 95,56%-ı teşkerilgen soñ Petro Poroşenkoğa 2 mln 866 biñ saylayıcı (15,93%), Zelenskıyge ise – 5 mln 436 biñ insan (30,22%) qoltuttı.
Ukrainada martnıñ 31-nde prezident saylavları olıp keçti. Saylayıcılarnıñ 63,5%-ı rey berdi.
Milliy exit poll malümatına köre, Volodımır Zelenskıy 30,6%, Petro Poroşenko – 17,8%, Yuliya Tımoşenko – 14,2%, Yuriy Boyko – 9,7%, Anatoliy Grıtsenko – 7,1%, Aleksandr Şevçenko – 0,5% qazandı.
Merkeziy saylav komissiyası saylavlarnıñ soñki neticelerini aprelniñ 10-na qadar ilân etmeli. Ekinci tur aprelniñ 21-nde olacaq.
