"Oraza Bayramı kününde dindaşlar bütün musulmanlarğa – Ukrayina devletiniñ topraq bütünligi ve mustaqilligini qorçalağan ve Qırımnıñ azat etilüvini yaqınlaştırğan Ukrayina mudafaa quvetleriniñ arbiy hızmetçilerine ayrı teşekkür sözlerini bildireler," - dey Çubarov hayırlavında.
O şunı da qoştı ki, Allahqa ibadet etip, tuvğan Qırımğa sadıq olıp, özara birlikni pekitip, qırımtatarlar Rusiye işğalcilerine qarşılıq köstere, olarğa öz tamır halqınıñ iradesini yıqmağa bermeyler.
Çubarov şunı da qayd etti ki, yüzlernen vatandaşları - siyasiy mabüsler "Rusiye apishaneleri ve koloniyalarınıñ divarlarında cesür ve sarsılmaz qalıp, qırımtatar halqınıñ azatlıq sevgen ruhını numayış eteler ve Qırımnıñ Rusiye barbarlarından azat etilüvine olğan işançını qaviyleştireler".
"Yüce Allah epimizden ve yapqan işlerimizden razı olsun! Yüce Allah Ukrayinağa rusiyeli duşman üzerinde ğalebe bersin!" - dep yekünledi Meclis reisi.
Aprel 10-da Qırımnıñ bütün camilerinde Ramazan ayınıñ yekünlenmesi ve Oraza bayramınıñ başlanuvı munasebetinen bayram namazları keçti. Bayram üç kün devam etecek.
Hatırlatamız, Oraza bayramı üç kün devam etecek. Ramazan ayınıñ bailanması kibi Oraza Bayramı da yañı aynıñ peyda oluvına rastkele. Musulmanlar, Ramazan olarğa öz-özüni terbiyelemege, öz-özüni idare etmege, öz-özüni feda etmege ve daa az bahtlı olğanlarğa şefqat etmege ögretir, dep tüşüneler. O, aynı zamanda, cümertlik ve hayriye faaliyetini teşviq ete. Musulmanlar, oraza tutmaq (sabadan aqşamğa qadar aş ve içmekten vazgeçmek) başqalarğa merhamet köstermege yardım etekenine işanaar.
Bundan evel Qırımtatar Milliy Meclisiniñ reisi Refat Çubarov aprel 9-10 künleri Oraza bayramında qırımlı siyasiy mabüslerniñ qorantalarını ziyaret etmege çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
