Aqyarnıñ Rusiye yolbaşçısı Mihail Razvojayev içtimaiy ağlarda bir çoq şikâyetlerden soñ şeerdeki sığınaqlar cenkniñ "kerçegine" azır olmağanını itiraf etti.
"Er keske israrlı ricam: yeter telâş çıqarmaq ve böyle etip duşmanlarımızını quvandırmaq. Telâş tam olarnıñ maqsadıdır. Daa bir yıl evelsi şeerde daa tınç olğanda bir sığınaqlarnı azırlay edik. Şimdi olğanı ise bu endi kerçektir", - dep yazdı o.
Memurnıñ sözlerine köre, şeerniñ bütün sığınaqlarını azırlamaq ve donatmaq imkânsızdır, çünki buña milliardlar kerek.
"Sığınaqlarğa kelgende daa bir müim şeyni añlatmaq isteyim: birisi kelir de siz içün suv yedegini yapar, kreslolar qoyar dep beklemeñiz... Daa bir kere qayd etem, sığınaqlar muvaqqat, bu bomba sığınağı degil. Olar raketalar parçalarından, parlanğan pecrebe camlarından saqlanmaq içün kerek", - dep qoştı o.
Aqyarğa raketa ücüminden soñ adamlar içtimaiy ağlarda sığınaqlar olmağanına, ava telükesi signalı er yerde eşitilmegenine şikâyett etip başladılar.
Sentâbrniñ 22-nde kündüz işğal altındaki Aqyarda bir qaç patlav aqqında haber etildi. Şeerniñ Rusiye valisi Mihail Razvojayev Telegramda Rusiye Qara deñiz flotunıñ ştabına raketa darbesi endirildi, dep haber etti.
Rusiye Mudafaa nazirligi darbeden soñ bir arbiy ğayıp oldı, ava mudafaa quvetleri beş raketa urıp tüşürgen, dep bildirdi. Aynı vaqıtta içtimaiy ağlarda darbe neticesinde altı kişi yaralandı, dep yazalar. Bu malümatnı tasdıqlaycaq resmiy bir delil yoq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
