Ukrayına prezidenti Volodımır Zelenskıy Ofisiniñ yolbaşçısı Andriy Yermaknıñ Türkiye prezidentiniñ baş mesleatçısı İbrahim Kalın ve ABD prezidentiniñ milliy telükesizlik mesleatçısı Ceyk Sallivan ile keçirgen muzakerelerini «pek tam ve Ukrayına menfaatlarına uyğun» dep adlandırdı.
«Ofis reberiniñ ABD ve Türkiye prezidentleriniñ mesleatçıları – Ceyk Sallivan ve İbrahim Kalın ile muzakereleri oldı. Tam muzakere. Bütünley – Ukrayına menfaatlarına uyğun. Bizim telükesizligimizni quvetleştirmek içün», – dedi o, video muracaatında.
Ukrayına prezidenti ofisiniñ matbuat hızmeti bildirgenine köre, Türkiyede Andriy Yermak İbrahim Kalın ve Ceyk Sallivan ile üç taraflı ve eki taraflı formatta körüşti.
Berilgen malümatqa köre, subetdeşler cebedeki vaziyetni ve Rusiyeniñ soñki agressiv areketlerine cevap tedbirleriniñ koordinatsiyasını muzakere etti. Yerman Rusiyeniñ işğal altındaki Ukrayına topraqlarında keçirgen sahte referendumlarğa ve ilhaq ıntıluvlarına sert bir cevap berilmeli, Ukrayına NATOğa kirgenine qadar halqara telükesizlik kefaletlerini almalı, dep qayd etti.
Beyaz Saray bildirgenine köre, Ceyk Sallivan ve Andriy Yermak ABD Ukrayına suvereniteti ve topraq bütünligine «qoltutqanını», Zaporijjâ atom elektrostantsiyasındaki vaziyeti ve Ukrayınanıñ aşayt ihracatında BM ile işbirliginiñ devamını muzakere etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
