Ukrayina Tış işler ve Mudafaa nazirleri Andriy Sıbiğa ve Rustem Umerov Parijge Avropa ve ABD ittifaqdaşlarınen körüşmege keldi, dep bildirdi aprelniñ 17-nde eyyet erkânına kirgen Ukrayina prezidentiniñ ofis yolbaşçısı Andriy Yermak Telegram kanalında.
«Şimdi Parijge keldim. Tış işler naziri Andriy Sıbiğa ve mudafaa naziri Rustem Umerovnen beraber keldik. Ziyaret çerçivesinde telükesizlik istegen ve temin ete bilgen devlet vekillerinen, hususan Frenkistan, Almaniya ve Büyük Britaniyadan eki taraflı ve çoq taraflı körüşüvlerni planlaştıramız. Al-azırda Frenkistanda bulunğan ABD vekillerinen de körüşüvler planlaştırıla», – dep yazdı Yermak.
Ukrayina Tış işler nazirligi qayd etkenine köre, körüşüvler Ukrayinada barışıq añlaşması boyunca mesleatlarnıñ devamı olacaq. «Hususan, taraflar ateşni bütünley toqtatuv yolları, turğun barışıqnı temin etmek maqsadınen çoq milletli arbiy kontingentni celp etüv, Ukrayina telükesizligi mimarlığınıñ inkişafı ve devletimizniñ telükesizligi temin etüvni muzakere etecekler», – dep aytıla haberde.
ABD Devlet departamenti devlet kâtibi Marko Rubio ve prezident Donald Trumpnıñ mahsus vekili Steve Witkoff Parijni ziyaret etecekler, dep aytılğan edi. Berilgen malümatqa köre, ziyaret aprelniñ 16-nda 18-nde olacaq, ve onıñ maqsadı – «prezident Trumpnıñ Rusiye-Ukrayina cenkini toqtatuv ve qanlı uruşnı toqtatuv maqsadını ileriletmek içün avropalı zenaatdaşlarınen muzakereler».
Witkoff Rusiye prezidenti Vladimir Putinnen körüşmek içün Rusiyege bir qaç kere keldi. Rubio Er-Riyadda Rusiyenen muzakerelerde ABD eyyetiniñ yolbaşçısı edi.
Moskva resmiy şekilde barışıqqa ıntılğanını bildire, amma Ukrayina işğal etilgen Qırım ve Moskva ilhaqını ilân etken, amma bütünley kontrol etmegen dört vilâyetten vazgeçecek, NATOğa kirmeycek şartınen ve diger talaplar aqqında aytıladır.
Soñki vaqıtları ABD prezidenti Donald Trump Rusiye «laftan areketke keçip», barışıqqa ıntılğanını köstermeli, dep bir qaç kere ayttı. Aynı vaqıtta ABD prezidenti cenk mesüliyeti tek onı başlatqan Rusiye prezidenti Vladimir Putinde degil, amma Ukrayina lideri Volodımır Zelenskıy ve Trumptan evel ABD prezidenti olğan Joe Bidende de bar, olar, Trumpnıñ fikirince, «oña yol bermemek içün bir şey yapmadı».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
