Ukrayina prezidenti Volodımır Zelenskıynıñ teklif etken "sulh formulasınıñ" ömürge keçirilmesi ile bağlı üçünci körüşüv "devlet liderleri seviyesinde Global sulh sammitiniñ azırlanması içün belli bir qararlarnıñ işlep çıqarılmasına yönelgen bir platformağa çevirilmelidir". Bunı oktâbrniñ 26-nda Ukrayina prezidenti ofisiniñ yolbaşçısı Andriy Yermak bildirdi.
Onıñ sözlerine köre, dünya memleketleriniñ artıq 60-tan çoq temsilcisi Maltada keçirilmesi planlaştırılğan milliy telükesizlik mesleatçıları seviyesinde toplaşuvda iştirigini tasdıqlağan.
"Bu Ğarp, Global Cenüp memleketleridir. Körüşüvde Sulh formalasınıñ erzaq, energetika ve özek telükesizligi, gumanitar meseleler, şu cümeden Rusiye tarafından esir etilgen arbiyler ve qaçırılğan ukrayinalı balalarnıñ qaytarılması, Ukrayina topraq bütünligiñ eski alına ketirilmesi ile bağlı maddeler muzakere etilecek", - dep bildirdi o.
Ukrayinada vaziyetniñ barışıq yolu ile al etilmesinden evelki muzakereler avgustnıñ başında Saudi Arabistanınıñ Cidda şeerinde olıp keçti. O zaman körüşüvde 40-tan çoq memleketniñ temsilcisi iştirak etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
