Qırım gazetaları sanlarınıñ esas maqalelerini yarımadadaki zor koronavirus vaziyetine bağışladı.
«Krımskaya pravda» «Lokalnıy karantinı» («Lokal karantinler») maqalesinde koronavirus hastaları qayd etilgen 21 Qırım mektebiniñ 46 sınıfı uzaqtan tasilge keçti, dep bildire. Eñ çoq hasta İslâm Terek ve Aqmescit rayonlarınıñ tasil müessiselerinde qayd etildi. Daa çoq ocalar hastalana, olarnen alâqada olğan balalar yapılğan tedqiqlerden soñ oquş esnasına qayta.
«Bütün mekteplerniñ uzaqtan tasilge keçmesi artıq aytılmay. Amma müessiseler özüni izolâtsiya etüv rejimine qayta bile. Cumhuriyetniñ ükümeti Rospotrebnadzor talaplarına riayet etmegen ticaret obyektlerini qapatmağa qarar aldı», – dep yaza gazeta.
«Komsomolskaya pravda. Krım» «Mest net, leçites doma» («Yer yoq, evde tedaviylenmeñiz kerek») maqalesinde Qırım hastahaneleri bütün koronavirus hastalarını ne içün qabul etip olamağanını tarif ete. «Oktâbrden itibaren alı yahşı olğan koronavirus hastaları evde tedaviylenecek. Hastahanelerde yer yetmey, «pnevmoniya» diagnozınen bile hastahanege almaylar, bu da bazı vaqıtları ölüm sebebi ola. Turistler ketkeninen yer sayısı artmadı – er kün tahminen 70 COVID-19 hastası qayd etile ve er ekincisi Aqmescitte ola», – dep qayd ete gazeta.
«Krımskiye izvestiya» muarrir sutunında ekimlerniñ koronavirus hastalarını saylap ala, dep aydınlata. «Soñki adise şaşırttı. 47 yaşında aqmescitli yaramadı. O, yardım çağırdı. Kelip onı oksigen ballonına bağlağanlar. Er adamı nefes alıp başladı, daa yahşı olğanını ayttı. Ballonnı söndürip alıp ketkenler. Eki saattan soñ Vefat etti. Jurnalistler tafsilâtlarnı ögrene. Şunıñ içün adres ve soyadlarını şimdi aytıp olamayım. Amma telükeli bir işaret», – dep yazdı müellif.
Muarrirniñ fikirince, «ekimlerniñ pervasızlığı ve tsinizmi – kütleviy degil, Qırım sağlıq naziriniñ böyle kederli şeyni aytmaq sebebi olğanına yazıqsınamız: «Yüksek sıcağı olğan sakinlerni evde qaldırıp kete ekenler. Er bir adiseni baqamız».
