Qasırğalı yel Alupkadaki Vorontsov sarayınıñ vaqtınca damını qoparıp alıp ketti, neticede sağanaq odalarnıñ bir qısmını suvnen bastı. Alupka saray-park müzey-qoruğınıñ müdirligi malümatına köre, birinci ve ekinci qatta divarlar sılandı.
«Bu vaziyetten sebep müzey-qoruq baş binada elektrikni söndürmege ve müzey fondunıñ bir qısmını ve eksponatlarnı diger binalarğa çıqarmağa qarar aldı. Müzey eşyaları yoq olmadı», – dep aytıla haberde.
Müdirlikniñ malümatına köre, bu vaziyette saraynıñ parad salonlarınıñ ekspozitsiyası iyünniñ 10-na qadar qapalı olacaq.
İçtimaiy ağlarnıñ qullanıcıları saraynıñ suv basqan mavı musafirhane fotolarını derc etti.
Bu sene fevral ayında Alupka saray-park müzey-qoruğınıñ müdir muavini Konstantin Kasperoviç qurucılar saray damınıñ parçalarını sökti, dep bildirgen edi. Onıñ aytqanına köre, bu restavratsiya işleri çerçivesinde yapıldı.
2017 senesi yazda Alupkadaki Vorontsov sarayınıñ reberligi 116 million ruble sarf etilgen qazağa qarşı işlerniñ neticeleri aqqında esabat berdi.
Kreml kontrolindeki Qırım ükümetiniñ matbuat hızmeti bildirgenine köre, sarayda kanalizatsiya, bir qaç binanıñ damı tamir etildi, tayanç divarı ve merdiven tertipke ketirildi.
Vorontsov sarayı Ukraina medeniy mirasınıñ milliy emiyeti olğan abidesi sayıla. 1956 senesinden berli sarayda müzey yerleşmekte. Vorontsov sarayında park bar – bağça-park sanatınıñ abidesi.
