Yekaterinburgda, uçucısız uçaqlarnıñ ücüminden soñ Wildberries anbarında yanğın oldı. Bu aqta rus şirketiniñ matbuat hızmeti bildirdi. O, Ukrayina sıñırından eki biñ kilometrden ziyade uzaqta buluna.
"Şirketniñ Sverdlovsk vilâyetiniñ Yekaterinburg şeerindeki logistika obyektinde yanğın telükesi çalışmaqta, ücüm sebebinden yanğın çıqtı. Obyektte evelden tahliye keçirildi. Şimdiki teslimatlarnıñ qabul etilüvi vaqtınca sıñırlandı, olar başqa obyektlerge yollandı", — denile beyanatta.
Rusiye Federatsiyasınıñ Sverdlovsk vilâyetiniñ gubernatorı Denis Pasler, Rusiye arbiyleri ve mobil ateş gruppaları sekiz uçucısız uçaqnı urıp tüşürgenlerini bildirdi. Onıñ aytqanına köre, üç uçaq logistika merkeziniñ damına tüşti, yaralanğanlar yoq.
Prezidentniñ Ural federal okrugındaki vekâletli temsilcisi Artem Joga aytqanı kibi, logistika obyektinden 800 insan tahliye etildi.
İnternette derc etilgen fotoresimler ve videolarda eki yanğın noqtası körüne.
Rusiye Mudafaa nazirligi, Armannıñ 7-ne keçer gecesi Belgorod, Brânsk, Volgograd, Voronej, Kaluga, Kursk, Lipetsk, Rostov, Râzan, Saratov, Sverdlovsk, Tula vilâyetleri, Krasnodar ülkesi, Perm ülkesi, işğal etilgen Qırım, Tatarstan, Başqortstan ve Qara deñiz akvatoriyasında 203 Ukrayin uçucısız uçağı tüşürilgenini bildirdi.