Rusiye apishanelerinde saqatlığı olğan yedi qırımlı siyasiy mabüs tutula, dep haber ete Qırımtatar resurs merkezi. Kerekli tibbiy yardımnıñ olmaması, kelişmegen tutuv şaraitleri ve şikâyetlerniñ körmemezlikke uruluvı sağlıq vaziyetleriniñ fenalaşmasına ya da ölümine sebep ola.
Qırımtatar resurs merkeziniñ malümatına köre, al-azırda qanunsız tutulğanlar:
- Zekirya Muratov – III derece saqatı
- Timur İbragimov – III derece saqatı
- Servet Gaziyev – II derece saqatı
- Amet Suleymanov – III derece saqatı
- Timur Yalkabov – III derece saqatı
- Rustem Seytmemetov – III derece saqatı
- Nikolay Petrovskiy – III derece saqatı
- Remzi Kurtnezirov, II derece saqatı, al-azırda ev apsinde buluna.
«Bu insanlar ağır hasta. SİZO ve apishanelerdeki tutuv şaraitleri, alından olğan şikâyetlerine qulaq asılmaması ve kerekli tibbiy yardımnıñ kösterilmemesi sebebinden sağlıq vaziyetleri fenalaşmağa devam ete. Ve, ne yazıq ki, facialı neticeler bar – 60 yaşında II derece saqatlığı olğan siyasiy mabüs Cemil Gafarov, ciddiy sağlıq problemleri olğan 61 yaşında Konstantin Şiring ve 60 yaşında Rustem Viratiye vefat etkenler», – dep aytıla haberde.
Hatırlatamız, Rusiyeniñ Krasnoyarsk ülkesiniñ Minusinsk şeer mahkemesi soqurlığı sebebinden I derece saqatı olğan 39 yaşında qırımlı Aleksandr Sizikovnı apisten azat etti. O, sekiz aydan ziyade apiste yattı. Mayısnıñ 28-nde onı Soçide anası ve advokatı qarşıladılar, erkek Qırımğa yol aldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
