Qırımnıñ Yedi Quyu (Leninskiy) rayonı ve Keriç şeerinde yarıq söndürildi, dep haber etti fevral 5-inde saba “Krımenergo” şirketiniñ matbuat hızmeti.
Saat 8:00-da saba Yedi Quyu rayonınıñ Dere Salın (Çistopolye) köyüniñ bir qısmı yarıqsız qaldı. “Krımenergo” mütehassısları qaza yerini qıdıra, dep bildirile.
Bundan ğayrı gece Keriçte tel hatınıñ zararlanğanı sebebinden yarıq olmadı. Energetikler, mesele çezildi dep bildire.
2016 senesi baarde rus energoköprüniñ üçünci pıtağı işini başlağanına baqmadan, Qırımda yarıq söndürmeleri devam etmekte. 2015 senesi dekabrden başlap Herson vilâyetinde energetik tiremelerniñ bozulğanından soñ, Ukrainadan Qırımğa elektroenergiya berilmey. Şimdilik Qırım öz generatorları, Rusiye generatorları ve Kuban energoköprüniñ elektrik ağını qullana.
