«Veciye Kaşka davasınıñ» mabüsleri Kazim Ametov, Asan Çapuh ve Bekir Degermenciniñ advokatları mabüslerniñ sağlıq vaziyeti fenalaşqanını bildirdi, dep haber ete Qırım.Aqiqat mühbiri.
«Bugün (yanvarniñ 9-nda – QA) mabüslerniñ ayatı ve sağlığı telükede, dedik. Şunı aytmağa isteyim ki, bu (izolâtorda tutuv – QA) azap, yavaş öldürüv ola», – dep bildirdi Kazim Ametovnıñ advokatı Emil Kurbedinov.
Onıñ aytqanına köre, Ametovnıñ sağlıq vaziyeti «kritik» oldı.
«Er bir mahkeme oturışuvında onıñ alı daa beter ola. Nefes alamağanını ayta, közleri qıp-qırmızı, bugün onı körgenimde zornen nefes ala edi, kamerası küf tolu. Oña ine uralar, dep ayttı, amma bir faydası yoq», – dedi Kurbedinov.
Asan Çapuhnıñ advokatı Ayder Azamatov Qırımnıñ Rusiye akimiyetini vaziyetke uyğun bir cevap bermege çağırdı.
«Müşterimniñ misalinde köremiz ki, SİZOda ne qadar çoq qalsalar, vaziyet daa beter ola, soñra olarğa yardım etmege imkânsız olur. Asan Çapuh eskiden iç ilâc almay edi, şimdi ise çoq ilâc qullana. Bir taraftan, tedaviyleyler, ekinci taraftan – saqat yapalar. Qırım akimiyetini vaziyetke qulaq asıp, uyğun tedbir almağa çağıram», – dedi Azamatov.
Advokat Edem Semedlâyevniñ bildirgenine köre, mabüs Bekir Degermenciniñ sağlıq vaziyeti eyileşmey.
«Bu davada can bergen insan endi bar – Veciye Kaşka. Qalğanları bir ucda tura, Degermenci de şu sırada. Suvuq allergiyası bar, sağlıq vaziyeti fenalaşa, bugünki oturışuvda laf etip olamadı ve qadınıñ suallerine bile cevap bermedi. Elimizden kelgenini yapacaqmız – şikâyet, ariza, muracaatlar berecekmiz», – dedi Semedlâyev.
Rusiye kontrolindeki Aqmescitniñ Kiyey rayon mahkemesi yanvarniñ 9-nda «Veciye Kaşka davasınıñ» oturışuvını yanvarniñ 24-ne avuştırdı, çünki qabaatlanğanlardan biri, qırımtatar faali Asan Çapuh kelip olamadı.
Yanvarniñ 7-ne keçer gecesi Çapuh Aqmescit hastahanelerinden birine acele alındı. Advokat Ayder Azamatov mabüsni Aqmescitniñ 6-ncı hastahanesinde ziyaret etken soñ sağlıq alı bir qarar, dep bildirdi.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
