Rusiye quvetçileri 25 yaşındaki qırımtatar Emine Zekeryayevağa qarşı cinayet davasını açqanlar. "Qırım birdemligi"niñ malümatına köre, o "cinayet aqqında haber etmemek"te qabaatlana.
Rusiye tahqiqat organlarınıñ malümatına köre, 2016 senesi Zekeryayeva "VKontakte" içtimaiy ağında Suriyede yerleşken Ukrayina vatandaşı ile yazışqan ve bu yazışmalar aqqında Rusiye mahsus hızmetlerine ve qanun qoruyıcı organlarına malmüat bermegen eken. Quvetçilerniñ fikrince, qız "RF menfaatlarına zıt" maqsatları olğan silâlı birleşmeniñ azası edi.
Advokat Emil Kurbedinov, mahsus hızmetler ve diger tahqiqat organları bu kibi cinayet davaları vastasınen adiy vatandaşlarnı celp etmege ve resmiyleştirilgen çaqma tecribesini meydanğa ketirmege tırışqanlarını saya.
"Olar vatandaşlar FSB hadimleriniñ operativ işini yerine ketirgenini, FSB tahqiqatnıñ saasına ait olğan şübeli er angi vaziyet, laf aqqında haber etkenlerini isteyler. Bu madde pek añlaşılmağan bir şekilde yazılağan. Mahkemede onıñ qullanması bu kibi davalarda mudafaanı daa da mürekkepleştire. Açıq cinayetler aqqında söz ketkende er şey añlaşıla, bir şey kördiñ de haber etmediñ. Amma Emineniñ vaziyetine kelgende er şey bam-başqadır'', - dep añlattı Kurbedinov.
Zekeryayevağa qarşı qullanğan madde 100 biñ ruble para cezasını, bir yıl devamında mecburiy işler ya da bir yıl apis cezasını köz ögünde tuta.
"Menimce, bu qırımtatarlarnı qorqutmaq içün yapıla. Olar içün delillersiz böyle davalarnı açmaq adiy şeydir. Evimde tintüv keçirilgen soñ maña qarşı birden dava açılğan edi, men ise bunı eki aydan soñ bildim", - dep izaatladı vaziyetni Zekeryayeva.
Avgustnıñ 7-nde Eski Qırımda 30 yaşındaki qırımtatar Asan Zekeryayevniñ evinde tintüv olıp keçken edi. Bundan soñ erkekni bellisiz yerge alıp ketken ediler. Biraz soñra olarnıñ evinde daa bir tintüv keçirilgeni belli olğan edi. Tintüvden soñ yaqalanğan Asan Zekeryayevni ve apayı Emine Zekeryayevanı Aqyamecitke alıp ketken ediler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
