Rusiye mahkemesi tarafından «qırımlı musulmanlar davası» boyunca 11 yılğa mahküm etilgen qırımtatar faali Yaşar Şihametov Rusiye koloniyasında 30 kilogramm azdı ve sağlıq vaziyeti sebebinden areket etip olamay, buğumları yoq olğanı içün ve diger hastalıqlar sebebinden yürip olamay. Bu aqta ömür arqadaşı Liliya Şihametova «Qırım birdemligine» ayttı.
Şimdi qırımlı Rusiyeniñ Kemerovo vilâyetindeki İK-37-de cezasını çeke. İyünniñ soñunda onı Saratovdaki FKLPU OTB-1 hastahanesinden etap ettiler.
«Sağlığı qalmadı. Saratovda apishane hastahanesinde yattı, anda soñunace tedaviylenmedi, onı etap ettiler», – dep ayttı ömür arqadaşı.
Şihametov buğumları yaramay olğanı içün yürip olamay, aşını ketireler. Advokatnen körüşüvge saqat arabaçığında ketirildi.
«Yürgende ve oturğanda küçlü bir ağrım bar. Şunıñ içün men az yürem. Yürsem, qoltuq tayaqnen yürem. 50 metrlik mesafeni eki buçuq saatta keçem. Yürsem, er yerim pek ağıra, ağrımnı kesecek ilâc içmege mecbur olam. İlâclardan, aşqazan ülserinden, aşqazanım ağıra», – dep tarif etti qırımlı.
Sağlıq vaziyeti sebebinden oña kündüz yuqlamağa izin berildi, sert bir töşekte ve ayrı ayaqqap – papuç. İşten de boşatıldı. Koloniya müdiri hastahane ve saqatlıq meselesini çezmege emir etti.
Lâkin, Şihametov qayd etkenine köre, saqatlıq derecesi vesiqaları daa Saratovda azırlanmaq kerek edi, amma ekimler prokurornıñ emrinen etap sebebinen bunı yapıp yetiştiremedi.
Şimdi ağrı kesken, qan basımı ve raatlatqan ilâclar içe. Episini soy-sopları yollay.
«Omurğadaki diskler sürtildi, ekinci ve üçünci derece buğumları yoq oldı: tas kemigi-but, tiz ve ayaq, qan basımı arta, yüregi ağıra, şeker hastalığı şübhesi, baş ağrıları, qulaqları ağıra ve sağ qulağı yaramay eşite, közleri yaramay köre, nefes-nefeske qala», – dep ayttı alını Şihametov.
2021 senesi fevralniñ 17-nde Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
2022 senesi sentâbrniñ 9-nda Rostov-na-Donu Cenübiy okrugınıñ arbiy mahkemesi Yaşar Şihametovnı terrorizmde qabaatlap, 11 yılğa azatlıqtan marum etti.
Aq qorçalayıcılarnıñ fikirince, teşkilât azalarını ükümet devrimini azırlav ve terrorizm içün degil, firqa tarafdarlarınıñ Qırımda siyasiy repressiyalarğa qarşı cemaat aktsiyaları, Rusiye akimiyetini tenqit etkenleri ve qırımtatarlar 2014 senesi işğalge qarşı çıqqanları içün taqip eteler.