Rusiye tarafından 13 yılğa mahküm etilgen 56 yaşında qırımtatar faali Yaşar Muyedinov qolu pek ağıra ve ayaqları şişe, dep ayttı. Rusiye Federatsiyasınıñ Ulyanovsk vilâyetindeki Dimitrovgrad apishanesinde onı baqacaq ekim yoq, dep haber ete «Qırım birdemligi».
Muyedinov sağlıq problemlerinden bir qaç kere şikâyet etken edi, hususan ayaqları şişkenini bildirgen edi. Avgustnıñ soñunda apayına bunı aytqan edi. O vaqıttan berli qırımlını öyle de baqmadılar.
Faallerniñ qayd etkenine köre, Muyedinov qorantasınen pek az bağlana – ayda bir kere, şu sebepten tuvğanları sağlıq vaziyetiniñ deñişmelerinden haberdar degil.
«Ayda bir kere telefon etmege aqları bar, 15 daqqağa… Soñki sefer telefon etkende 15 daqqa bile olmadı – para yollamaq kerek olğanını, ne yollaycağımıznı laf ettik, sağlığını soramağa ise vaqıt olmadı», – dep aytıla haberde.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
2022 senesi noyabrniñ 24-nde Rostov-na-Donudaki Cenübiy arbiy okrugınıñ mahkemesi mabüslerni terror faaliyetinde ve akimiyet zapt etmege tırışqanlarında qabaatladı. Faaller Enver Ametov ve Yaşar Muyedinov 13 yıl sert rejimli koloniyada, vatandaş jurnalistleri Ruslan Suleymanov, Rustem Şeyhaliyev ve Osman Arifmemetov 14 yıl koloniyada qalmasına üküm etildi. Mabüsler 4 yılnı apishanede keçirecek, soñra daa 1 yılğa areket serbestligi sıñırlanacaq. Mabüsler özüni qabaatlı olaraq tanımayıp, siyasiy taqip olğanını tüşüneler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
