Rusiyede yasaqlanğan «Hizb ut-Tahrir» teşkilâtında iştirak etmesinde şeklengen Balıqlava rayonınıñ sakini Enver Seytosmanov ile yarım yıldan berli bir de bir tahqiqat tedbirleri keçirilmey.
Bunı advokatı Emil Kürbedinov haber ete.
Advokatnıñ videosı Facebookta «Qırım birdemligi» cemaat birleşmesiniñ saifesinde derc etildi.
«Enver ne sebepten qabaatlana bile añlaşılmay. Bunıñnen bağlı bir de bir vesiqa alâ daa berilmedi», – dep qayd ete advokat.
Onıñ aytqanına köre, tahqiqat izolâtorında tutulğan Seytosmanovnıñ alı fenalaştı. O, SİZO memuriyetine bir qaç mektüp yazdı, amma alâ daa baqılmadı.
«Bayağı vaqıttan berli Quran-ı Kerim berilmesini talap etkenini ayttı. Bunı yapmaq imkânsızdır, amma oña yardım etmege tırışacaqmız, SİZO memuriyeti musulmanlarnıñ muqaddes kitabını ne içün bermegenini bilmege tırışacaqmız», – dedi Kürbedinov.
Rusiye nezaretindeki Aqyarnıñ Lenin şeer mahkemesi avgustnıñ 31-nde Balıqlava rayonınıñ sakini Enver Seytosmanovnıñ tevqif müddetini eki ayğa (noyabrniñ 7-ne qadar) uzattı.
Enver Seytosmanov Rusiye Cinaiy kodeksiniñ 205.5 maddesiniñ 2-nci qısmı boyunca «Terroristik teşkilâtnıñ faaliyetinde iştirak etüvde» qabaatlana. Rusiye telükesizlik hadimleri ağa-qardaş Ernes ve Enver Seytosmanovlarnı mayısnıñ 10-nda Aqyarnıñ Balıqlava rayonındaki Hayto (Tılovoye) köyünde, anda yapılğan tintüvlerden soñ tutıp alğan edi.
Daa soñra Ernes çıqarılıp yiberildi. Enverge cinaiy iş açılğanı boyunca qarar taqdim etildi. Ertesi künü Rusiyeniñ nezareti altında olğan Aqyarnıñ Leninskiy rayon mahkemesi Enver Seytosmanovnı tevqif etti.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
