Avgustnıñ 24-nde yaqalanğan qırımtatar faali Amethan Ümerov SİZO-da saqalını qırqmağa mecbur etildi, dep haber ettiler "Qırım birdemligi" cemaat birleşmesinde.
Haber etilgeni kibi, izolâtroğa qabul etilgende müessisedeki nizamğa atfı eterek ondan yeyecek ve bazı şahsiy eşyalar alınğan.
"Yaqalanğan künü, mahkeme oturışından soñra, Amethannı tahqaiqat tevqifhanesine alıp kettiler. Onen beraber daa eki semetdeşi, dostu edi", - dep bildirdi Edem Semedlâyev.
Acliyeci Aqmescit tahqiqat tevqifhanesinde şarait pek qıyın dep bildirdi. Saba saat 6-dan aqşam saat 10-ğa qadar yataqqa oturmaq ya da yatmaq yasaqtır. Olar bütün kün ayaqta ya da demir iskemlede keçireler", - dep qoştı o.
Avgustnıñ 24-nde Bağçasarayda ve Bağçasaray rayonında Rusiye uquq qoruyıcıları qırımtatarlar Ruslan Asanov, Seydamet Mustafayev, Remzi Nemetulayev, Abdulmecit Seytumerov, Amethan Umerov ve Eldar Yakubovnıñ evlerinden tintüv keçirdi. Bundan soñ olarnı Aqmescitteki FSB binasına alıp ketkenler. Avgustnıñ 25-nde Rusiye mahkemesi olarnı eki ayğa SİZOğa yolladı.
Soñra Rusiye kontrolindeki Aqmescitniñ Kiyev rayon mahkemesi tutuğan 22 kişini 1 künden 7 künge qadar apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
