Rusiye kontrolindeki Aqmescitniñ Kiyev rayon mahkemesi martnıñ 5-nde tutulğan qırımtatar faalleri ve vatandaş jurnalistleri Memet Lümanov, Aziz Azizov, Rustem Osmanov ve Mustafa Abduramanovnı 2024 senesi mayısnıñ 4-ne qadar 2-nci SİZOğa yolladı. Bu aqta "Qırım birdemligi" haber ete.
Tutulğanlarnıñ episi - Bağçasaray sakinleri. Olarnı ''Hizb ut-Tahrir'' islâm siyasiy firqasınıñ işinde iştirak etkeninde qabaatladılar, dep qayd ete ''Qırım birdemligi''.
Faallerniñ episi mahkemelerde apiske alınğan semetdeşlerine qoltutqanları içün memuriy mesüliyetke çekilgen edi.
Advokat Edem Semedlâyevniñ aytqanına köre, yaqalanğan dört kişi mahkeme qararınen razı degil ve onı şikâyet etmege niyetlene.
Martnıñ 5-nde saba Qırımda qırımtatarlarnıñ evlerinde kütleviy tintüvler keçirildi. Bağçasarayda taqiqat tedbirleri "Qırım birdemliginiñ" faalleri, Canköy rayonında ise diniy erbaplar tarafından keçirildi. Umumen 10 qırımtatarınıñ evinde tintüvler keçirildi.
"QırımSOS" bildirgeni kibi, tintüvler dalğası işğalniñ 10 yılı içinde üçünci oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
