Yanvarniñ 24-nde işğal etilgen Qırımnıñ Canköy rayonında Rusiye quvetçileri tarafından yaqalanğan – Ekrem Kroş, Ayder Asanov, Refat Seydametov, Osman Abdurazakov, Leman Zekiryayev ve Halil Mambetov terroristik teşkilâtını teşkil etüv ve faaliyetinde iştirak etüv ile qabaatlanalar (RF Ceza qanunnamesiniñ 205,5 maddesi – QA). Bunı uquq qoruyıcı Lutfiye Zudiyeva Qırım.Aqiqatqa bildirdi.
Yaqalanğanlar arasında 2017 senesi bir kişilk piketlerde iştirak etken faaller. Olarnıñ arasında 67 yaşındaki Halil Mambetov.
Onıñ bildirgeni kibi, Rusiyeniñ nezaretinde olğan Qırım mediaları artıq RF FSB-sı yarımadada "Ukrayinadan idare etilgen islâmcı bölükni" yaqalağanı ile bağlı malümat yayınlağan.
"Bu, bir "terrorcılıq" faaliyeti ile bağlı resmiy suçlaması altında qırımtatar faalleriniñ, Qırım sakinleriniñ, qırımtatarlarnıñ yaqalanmasını kene köstere", - dedi Zudiyeva.
Yanvarniñ 24-nde işğal etilgen Qırımnıñ Canköy rayonında Rusiye quvetçileri qırımtatarlarnıñ evlerinde tintüv keçirdiler: Nemse Canköy köyünde (Blijnegorodskoye) Ekrem Kroşnıñ, Timofeyevka köyünde Ayder Asanov ve Refat Seydametovnıñ, Çoqraqlı Şeyh Eli Osman Abdurazakovnıñ, Canköyde Löman Zekiryayev ve Halil Mambetovnıñ evlerinde keçirildi.
Qırımnıñ işğal yolbaşçısı Sergey Aksönov qırımtatarlarnıñ evlerinde keçirilgen tintüvlerni izaatlap, quvetçiler "Ukrayina ile alâqalarda" qabaatlanğan altı kişini yaqalağanını bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
