Poloniya prezidenti Ancey Duda HAMAS teşkilâtı ve İsrail arasındaki şimdiki çatışma Rusiye içün elverişlidir, dep saya. Çünki o Moskvanıñ Ukrayinağa qarşı tecavuzından dünya toplulığınıñ diqqatını dağıta ve Avropağa yañı migrant basqısına ketire bile.
"Şübesiz ki, Rusiye ve onıñ Ukrayinağa qarşı tecavuzı içün bu elverişlidir. Bu dünyanıñ diqqatını dağıta... Amma eñ çoq bunıñ Avropağa yañı migrant basqısına sebep olacağından qorqam", - dep bildirdi Duda.
Poloniya prezidenti, Yaqın Şarqtan "Avropağa uracaq" yañı bir migrant dalğasınıñ olacağını tahmin ete.
Oktâbrniñ 7-nde HAMAS Filistin teşkilâtı İsrailni kütleviy şekilde ateşke tuttı. Aynı zamanda boyevikler memleketniñ territoriyasına kirdiler.
Bir çoq israilli, şu cümleden balalar da esir alınğan. İsrail ordusı "Demir qılıç" ameliyatına keçire ve Gazağa cevap olaraq avadan darbeler endire.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
